ܓܲܒܲܝܵܬܹܐ ܕܡܵܘܬܒܼܹܐ ܡܲܗܲܠܵܝܹܐ ܦܝܼܫܹܐ ܝܢܵܐ ܥܒܼܝܼܕܹܐ ܒܐܵܗܵܐ ܝܲܪܚܵܐ ܕܬܸܫܪܝܼܢ ܩܲܕ݉ܡܵܝܵܐ. ܐܲܚܢܲܢ ܒܸܕ ܫܲܕܪܲܚ ܠܵܘܟܼܘܿܢ ܒܒܲܪܝܼܕܵܐ ܚܕܵܐ ܟܲܪܡܘܼܟܼܬܵܐ ܕܘܲܪܵܩܵܐ ܕܓܲܒܲܝܵܬܹܐ ܩܵܐ ܕܕܵܪܝܼܬܘܿܢ ܩܵܠܵܐ ܘܐܲܚܬܘܿܢ ܓܵܘ ܒܲܝܬܵܐ.

ܫܒܼܘܿܩܘܼܢ ܘܪܚܘܿܫܘܼܢ ܠ

• ܣܲܓܼܲܠܬܵܐ
• ܕܪܵܝܬܵܐ ܕܩܵܠܵܐ
• ܐ݉ܢܵܫܹܐ ܕܒܸܟܠܵܝܵܐ ܝܢܵܐ ܩܵܐ ܓܲܒܲܝܵܬܹܐ

ܠܲܝܬ ܓܲܒܲܝܵܬܹܐ ܩܵܐ Moira Shire Council ܐܵܗܵܐ ܫܲܢ݉ܬܵܐ. ܐܲܚܬܘܿܢ ܠܹܐ ܝܬܘܿܢ ܣܢܝܼܩܹܐ ܕܕܵܪܝܼܬܘܿܢ ܩܵܠܵܐ

ܡܵܢܝܼ ܡܵܨܹܐ ܣܲܓܼܸܠ ܫܸܡܹܗ ܠܕܪܵܝܵܐ ܩܵܠܵܐ

ܐܝܼܬ ܬܪܹܝܢ ܬܲܗܵܪܹܐ ܕܣܸܕܪܹܐ ܕܕܵܪܝܵܢܹܐ ܕܩܵܠܵܐ ܓܵܘ ܓܲܒܲܝܵܬܹܐ ܕܡܵܘܬܒܼܹܐ ܡܲܗܲܠܵܝܹܐ: ܣܸܕܪܵܐ ܕܕܵܪܝܵܢܹܐ ܕܩܵܠܵܐ ܕܐܘܼܚܕܵܢܵܐ ܘܣܸܕܪܵܐ ܕܕܵܪܝܵܢܹܐ ܕܩܵܠܵܐ ܕܡܵܘܬܒܼܵܐ.

ܣܸܕܪܵܐ ܕܕܵܪܝܵܢܹܐ ܕܩܵܠܵܐ ܕܐܘܼܚܕܵܢܵܐ

ܐܲܚܬܘܿܢ ܓܵܪܲܓ ܣܲܓܼܸܠܝܼܬܘܿܢ ܘܕܵܪܝܼܬܘܿܢ ܩܵܠܵܐ ܐܸܢ ܐܲܚܬܘܿܢ:

• ܝܼܬܘܿܢ ܚܲܕ ܡܼܢ ܪܵܥܝܲܬܹܐ ܐܘܿܣܬܪܵܠܵܝܹܐ
• ܝܼܬܘܿܢ 18 ܫܸܢܹܐ ܘܥܸܠܸܠ
• ܚܸܝܹܐ ܝܬܘܿܢ ܓܵܘ ܕܐܵܗܵܐ ܐܵܕܪܹܣ ܩܵܐ ܙܵܘܕܵܐ ܡܼܢ ܚܲܕ ܝܲܪܚܵܐ.

ܐܸܢ ܐܲܚܬܘܿܢ ܗܘܹܐܠܵܘܟܼܘܿܢ ܚܲܕ ܼܡܼܢ ܪܵܥܝܲܬܹܐ ܐܘܿܣܬܪܵܠܵܝܹܐ ܐܝܼܢܵܐ ܗܵܠܵܐ ܠܹܐ ܝܬܘܿܢ ܣܘܼܓܼܸܠܹܐ ܠܕܪܵܝܵܐ ܩܵܠܵܐ، ܐܲܚܬܘܿܢ ܓܵܪܲܓ ܣܲܓܼܸܠܝܼܬܘܿܢ ܗܲܠܣܵܥܲܬ 4 ܒܪܲܡܫܵܐ ܒܝܵܘܡܵܐ ܕܐܲܪܒܲܥܒܫܲܒܵܐ 7 ܒܐܵܒ.

ܪܵܒܵܐ ܐ݉ܢܵܫܹܐ ܣܘܼܓܼܸܠܹܐ ܝܢܵܐ ܠܕܪܵܝܵܐ ܩܵܠܵܐ ܓܵܘ ܙܘܼܝܵܚܹܐ ܕܪܲܥܝܲܬܘܼܬܵܐ. ܠܹܐ ܝܬܘܿܢ ܒܝܼܕܵܥܵܐ ܐܸܢ ܐܲܚܬܘܿܢ ܣܘܼܓܼܸܠܹܐ ܝܬܘܿܢ؟ ܡܲܚܒܸܪܘܼܢ ܠܲܢ ܥܲܠ ܡܸܢܝܵܢܵܐ 03 9209 0160 ܩܵܐ ܕܨܲܚܨܝܼܬܘܿܢ.

ܐܲܚܬܘܿܢ ܡܵܨܝܼܬܘܿܢ ܝܲܢ ܣܲܓܼܸܠܝܼܬܘܿܢ ܠܕܪܵܝܵܐ ܩܵܠܵܐ ܡܼܢ ܥܲܠ ܐܸܢܬܸܪܢܸܬ (ܒܠܸܫܵܢܵܐ ܐܸܢܓܠܸܣܢܵܝܵܐ) ܝܲܢ ܡܵܨܝܼܬܘܿܢ ܡܵܠܝܼܬܘܿܢ ܚܲܕ ܦ̮ܘܿܪܡ ܬܘܼܪܓܸܡܬܵܐ ܕܣܲܓܼܲܠܬܵܐ.

ܗܿܝ ܦ̮ܘܿܪܡ ܬܘܼܪܓܸܡܬܵܐ ܕܣܲܓܼܲܠܬܵܐ ܒܸܕ ܦܵܝܫܵܐ ܛܒܼܝܼܥܬܵܐ ܒܠܸܫܵܢܵܐ ܐܸܢܓܠܸܣܢܵܝܵܐ. ܐܲܚܬܘܿܢ ܡܵܨܝܼܬܘܿܢ ܕܓܵܪܫܝܼܬܘܿܢ ܕܪܵܥܢܵܐ ܥܲܠܘܿܗܿ ܘܫܲܕܪܝܼܬܘܿܢ ܠܵܗܿ ܩܵܐܠܲܢ ܠܐܵܕܪܹܣ:

Victorian Electoral Commission
Reply Paid 66506
Melbourne VIC 8001

ܐܲܚܬܘܿܢ ܠܹܐ ܣܵܢܩܝܼܬܘܿܢ ܠܣܬܵܡܦܵܐ.

ܨܲܚܨܝܼܡܘܼܢ ܝܲܢ ܚܲܕܸܬܘܼܢ ܠܦܘܼܨܵܠܹܐ ܕܡܵܘܕܥܵܢܘܼܬܵܘܟܼܘܿܢ

ܐܝܼܡܲܢ ܕܦܵܐܹܫ ܣܕܝܼܪܵܐ ܫܸܡܵܘܟܼܘܿܢ ܥܲܠ ܣܸܕܪܵܐ ܕܕܵܪܝܵܢܹܐ ܕܩܵܠܵܐ، ܓܵܪܲܓ ܐܲܚܬܘܿܢ ܚܲܡܝܼܬܘܿܢ ܠܦܘܼܨܵܠܹܐ ܕܡܵܘܕܥܵܢܘܼܬܵܘܟܼܘܿܢ ܚܘܼܕܸܬܹܐ. ܟܠ ܚܕܵܐ ܓܵܗܵܐ ܕܫܲܢܝܼܬܘܿܢ ܒܲܝܬܵܐ ܝܲܢ ܫܲܚܠܸܦܝܼܬܘܿܢ ܠܹܗ ܫܸܡܵܘܟܼܘܿܢ، ܐܲܚܬܘܿܢ ܓܵܪܲܓ ܚܲܕܸܬܝܼܬܘܿܢ ܠܦܘܼܨܵܠܹܐ ܕܡܵܘܕܥܵܢܘܼܬܵܘܟܼܘܿܢ.

ܐܸܢ ܐܲܚܬܘܿܢ ܫܘܼܢܝܹܐ ܝܬܘܿܢ ܠܚܲܕ ܒܲܝܬܵܐ ܐ݉ܚܹܪ݉ܢܵܐ ܝܲܢ ܫܘܼܚܠܸܦܹܐ ܝܬܘܿܢ ܫܸܡܵܘܟܼܘܿܢ ܒܥܸܕܵܢܵܬܹܐ ܐ݉ܚܵܪܵܝܹܐ، ܓܵܪܲܓ ܚܲܕܸܬܝܼܬܘܿܢ ܠܦܘܼܨܵܠܹܐ ܕܡܵܘܕܥܵܢܘܼܬܵܘܟܼܘܿܢ ܡܼܢ ܩܵܕ݉ܡ ܣܵܥܲܬ 4 ܒܪܲܡܫܵܐ ܒܝܵܘܡܵܐ ܕܐܲܪܒܲܥܒܫܲܒܵܐ 7 ܐܵܒ.

ܐܲܚܬܘܿܢ ܡܵܨܝܼܬܘܿܢ ܚܲܕܸܬܝܼܬܘܿܢ ܣܲܓܼܲܠܬܵܘܟܼܘܿܢ ܥܲܠ ܐܸܢܬܸܪܢܸܬ (ܒܠܸܫܵܢܵܐ ܐܸܢܓܠܸܣܢܵܝܵܐ)، ܝܲܢ ܡܲܦܠܸܚܝܼܬܘܿܢ ܗܲܪ ܗܿܝ ܦ̮ܘܿܪܡ ܡܬܘܼܪܓܸܡܬܵܐ ܕܣܲܓܼܲܠܬܵܐ ܩܵܐ ܕܚܲܕܸܬܝܼܬܘܿܢ ܠܐܵܕܪܹܣܵܘܟܼܘܿܢ ܝܲܢ ܕܫܲܚܠܸܦܝܼܬܘܿܢ ܫܸܡܵܘܟܼܘܿܢ.

ܣܸܕܪܵܐ ܕܕܵܪܝܵܢܹܐ ܕܩܵܠܵܐ ܕܡܵܘܬܒܼܵܐ

ܓܲܒܲܝܵܬܹܐ ܕܡܵܘܬܒܼܵܐ ܡܲܗܲܠܵܝܵܐ ܐܝܼܬܠܗܘܿܢ ܩܵܢܘܿܢܹܐ ܕܝܼܠܵܢܵܝܹܐ. ܐܸܢ ܐܲܚܬܘܿܢ ܠܹܐ ܝܬܘܿܢ ܚܲܕ ܡܼܢ ܪܵܥܝܲܬܹܐ ܐܘܿܣܬܪܵܠܵܝܹܐ، ܐܝܼܢܵܐ ܐܲܚܬܘܿܢ:

• ܝܼܬܘܿܢ ܡܵܪܵܐ ܕܚܲܕ ܡܘܼܠܟܵܢܵܐ، ܝܲܢ ܝܼܬܘܿܢ ܩܲܝܘܿܡܵܐ ܩܵܐ ܚܕܵܐ ܫܲܪܝܼܟܘܼܬܵܐ ܘܟܹܐ ܦܵܪܥܝܼܬܘܿܢ ܐܸܫܛܵܪܵܐ ܕܚܘܼܫܒܵܢܵܐ ܕܡܲܨܪܵܦܹܐ ܕܒܲܠܲܕܝܼܵܐ ܕܥܲܠ ܗܿܘ ܡܘܼܠܟܵܢܵܐ
• ܝܼܬܘܿܢ 18 ܫܸܢܹܐ ܝܲܢ ܥܘܼܠܘܼܠ
• ܠܹܐ ܝܬܘܿܢ ܗܵܙܹܪܵܢ ܥܲܠ ܣܸܕܪܵܐ ܕܕܵܪܝܵܢܹܐ ܕܩܵܠܵܐ ܕܡܵܘܬܒܼܵܐ

ܡܵܨܝܼܬܘܿܢ ܩܲܕܸܡܝܼܬܘܿܢ ܩܵܐ ܕܣܲܓܼܸܠܝܼܬܘܿܢ ܥܲܡ ܡܵܘܬܒܼܵܘܟܼܘܿܢ ܡܲܗܲܠܵܝܵܐ ܚܲܕܪܹܫܵܐ

ܡܵܘܬܒܼܵܐ ܕܡܕܝܼܢ݉ܬܵܐ ܕܡܸܠܒܘܿܪܢ ܐܝܼܬܠܹܗ ܩܵܢܘܿܢܹܐ ܕܓܵܢܹܗ. ܐܸܢ ܕܒܼܝܼܩܹܐ ܝܬܘܿܢ ܚܲܕ ܒܲܝܬܵܐ، ܝܵܪܝܼܥܬܵܐ (ܫܲܩܵܐ)، ܝܲܢ ܕܘܼܟܵܢܵܐ ܒܐܲܓܼܪܵܐ (ܟܸܪܝܼ) ܓܵܘ ܡܕܝܼܢ݉ܬܵܐ ܕܡܸܠܒܘܿܪܢ ܐܵܦ ܐܲܚܬܘܿܢ ܡܵܨܝܼܬܘܿܢ ܕܩܲܕܸܡܝܼܬܘܿܢ ܩܵܐ ܕܣܲܓܼܸܠܝܼܬܘܿܢ ܠܕܪܵܝܵܐ ܩܵܠܵܐ

ܡܲܚܒܸܪܘܼܢ ܩܵܐ ܡܵܘܬܒܼܵܘܟܼܘܿܢ ܡܲܗܲܠܵܝܵܐ ܚܲܕܪܹܫܵܐ ܩܵܐ ܕܨܲܚܨܝܼܬܘܿܢ ܐܸܢ ܐܲܚܬܘܿܢ ܝܼܬܘܿܢ ܕܵܪܝܵܢܹܐ ܕܩܵܠܵܐ ܣܘܼܓܼܸܠܹܐ ܥܲܡ ܡܵܘܬܒܼܵܐ ܝܲܢ ܐܸܢ ܓܵܪܲܓ ܩܲܕܸܡܝܼܬܘܿܢ ܩܵܐ ܣܲܓܼܲܠܬܵܐ. ܐܲܚܬܘܿܢ ܓܵܪܲܓ ܣܲܓܼܸܠܝܼܬܘܿܢ ܥܲܡ ܡܵܘܬܒܼܵܐ ܡܼܢ ܩܵܕ݉ܡ ܣܵܥܲܬ 4 ܒܪܲܡܫܵܐ ܒܝܵܘܡܵܐ ܕܐܲܪܒܲܥܒܫܲܒܵܐ 7 ܐܵܒ.

ܐܝܼܡܲܢ ܕܗܵܘܝܼܬܘܿܢ ܣܘܼܓܼܸܠܹܐ، ܓܵܪܲܓ ܕܵܪܝܼܬܘܿܢ ܩܵܠܵܐ. ܐܸܢ ܠܵܐ ܕܵܪܝܼܬܘܿܢ ܩܵܠܵܐ، ܒܲܠܟܵܐ ܦܵܪܥܝܼܬܘܿܢ ܬܲܢܒܵܐ (ܓ̰ܸܙܵܐ)

ܩܪܹܝܡܘܼܢ ܒܘܼܫ ܙܵܘܕܵܐ ܒܘܼܬ ܣܸܕܪܵܐ ܕܕܵܪܝܵܢܹܐ ܕܩܵܠܵܐ ܕܡܵܘܬܒܼܵܐ.

ܕܵܐܟܼܝܼ ܠܕܪܵܝܵܐ ܩܵܠܵܐ ܓܵܘ ܣܸܕܪܵܐ ܕܕܵܪܝܵܢܹܐ ܕܩܵܠܵܐ ܕܡܵܘܬܒܼܵܐ

ܐܲܚܢܲܢ ܒܸܕ ܫܲܕܪܲܚ ܠܵܘܟܼܘܿܢ ܚܕܵܐ ܟܲܪܡܘܼܟܼܬܵܐ ܕܕܪܵܝܬܵܐ ܕܩܵܠܵܐ ܡܼܢ ܬܪܹܝܒܫܲܒܵܐ 7 ܬܸܫܪܝܼܢ ܩܲܕ݉ܡܵܝܵܐ.

ܓܵܘ ܟܲܪܡܘܼܟܼܬܵܐ ܕܕܪܵܝܬܵܐ ܕܩܵܠܵܐ ܒܸܕ ܗܵܘܝܼ:

• ܚܲܕ ܘܲܪܵܩܵܐ ܕܕܪܵܝܬܵܐ ܕܩܵܠܵܐ
• ܒܘܼܝܵܢܹܐ ܡܼܢ ܐ݉ܢܵܫܹܐ ܕܒܸܟܠܵܝܵܐ ܝܢܵܐ ܩܵܐ ܓܲܒܲܝܵܬܹܐ
• ܚܲܕ ܙܲܪܦܵܐ ܕܘܲܪܵܩܵܐ ܕܕܪܵܝܬܵܐ ܕܩܵܠܵܐ (ܩܵܐܠܵܘܟܼܘܿܢ ܩܵܐ ܕܡܲܬܒܼܼܝܼܬܘܿܢ ܕܪܵܝܬܵܐ ܕܩܵܠܵܘܟܼܘܿܢ ܓܵܘܹܗ)
• ܚܲܕ ܙܲܪܦܵܐ ܥܲܠܹܗ ܐܲܕܪܹܣ ܘܛܝܼܡܵܐ ܕܦܘܿܣܬܵܐ ܦܪܝܼܥܵܐ ܠܵܩܵܕ݉ܡܵܐ (ܩܵܐܠܵܘܟܼܘܿܢ ܩܵܐ ܕܡܲܬܒܼܼܝܼܬܘܿܢ ܙܲܪܦܵܐ ܕܘܲܪܵܩܵܐ ܕܕܪܵܝܬܵܐ ܕܩܵܠܵܘܟܼܘܿܢ ܓܵܘܹܗ).

ܚܲܕܟܡܵܐ ܡܵܘܬܒܼܹܐ ܐܵܦ ܒܸܕ ܗܵܘܹܐܠܗܘܿܢ ܚܲܕ ܛܲܪܦܘܼܢܵܐ ܥܲܡ ܦܘܼܩܕܵܢܹܐ ܒܠܸܫܵܢܹܐ ܐ݉ܚܹܪ݉ܢܹܐ.

ܩܵܐ ܕܦܵܐܹܫ ܚܘܼܫܒܸܢܵܐ ܩܵܠܵܘܟܼܘܿܢ ܐܲܚܬܘܿܢ ܓܵܪܲܓ ܡܵܠܝܼܬܘܿܢ ܠܹܗ ܘܲܪܵܩܵܐ ܕܕܪܵܝܬܵܐ ܕܩܵܠܵܘܟܼܘܿܢ ܬܪܝܼܨܵܐܝܼܬ

• ܟܬܘܿܒܼܘܿܢ 1 ܓܵܘ ܨܲܢܕܘܼܩܵܐ ܕܝܼܠܹܗ ܠܓܹܒܵܐ ܕܦܲܪܨܘܿܦܵܐ ܕܒܵܥܝܼܬܘܿܢ ܩܵܪܹܡ
• ܟܬܘܿܒܼܘܿܢ 2 ܓܵܘ ܨܲܢܕܘܼܩܵܐ ܕܝܼܠܹܗ ܠܓܹܒܵܐ ܕܦܲܪܨܘܿܦܵܐ ܕܓܘܼܒܵܝܵܘܟܼܘܿܢ ܬܪܲܝܵܢܵܐ
• ܦܘܼܫܘܼܢ ܒܸܟܬܵܒܼܵܐ ܡܸܢܝܵܢܹܐ ܗܲܠ ܕܟܠܲܝܗܝ ܨܲܢܕܘܼܩܹܐ ܗܵܘܹܐܠܗܘܿܢ ܚܲܕ ܡܸܢܝܵܢܵܐ
• ܡܲܦܠܸܚܘܼܢ ܡܸܢܝܵܢܹܐ ܐܲܚܟ̰ܝܼ

ܡܵܘܬܒܼܵܐ ܕܡܕܝܼܢ݉ܬܵܐ ܕܡܸܠܒܘܿܪܢ ܐܝܼܬܠܹܗ ܩܵܢܘܿܢܹܐ ܕܝܼܠܵܢܵܝܹܐ. ܐܸܢ ܐܲܚܬܘܿܢ ܝܼܬܘܿܢ ܥܲܠ ܣܸܕܪܵܐ ܕܡܓܲܒܝܵܢܹܐ ܩܵܐ ܓܲܒܲܝܵܬܹܐ ܕ ܡܵܘܬܒܼܵܐ ܕܡܕܝܼܢ݉ܬܵܐ ܕܡܸܠܒܘܿܪܢ، ܐܲܚܬܘܿܢ ܒܸܕ ܩܲܒܠܝܼܬܘܿܢ 2 ܘܲܪܵܩܹܐ ܕܕܪܵܝܬܵܐ ܕܩܵܠܵܐ. ܐܲܚܬܘܿܢ ܓܵܪܲܓ ܡܵܠܝܼܬܘܿܢ ܠܗܘܿܢ ܬܸܪܘܲܝܗܝ ܘܲܪܵܩܹܐ ܕܕܪܵܝܬܵܐ ܕܩܵܠܵܐ.

ܥܲܠ ܘܲܪܵܩܵܐ ܕܕܪܵܝܬܵܐ ܕܩܵܠܵܐ ܒܘܼܿܫ ܙܥܘܿܪܵܐ، ܩܵܐ ܦܪܵܫܬܵܐ ܕܝܲܗܠܵܐ ܡܗܲܕܝܵܢܵܐ، ܐܲܚܬܘܿܢ ܓܵܪܲܓ ܡܲܬܒܼܝܼܬܘܿܢ ܡܸܢܝܵܢܵܐ ܓܵܘ ܟܠܲܝܗܝ ܨܲܢܕܘܼܩܹܐ ܒܪܹܐ݉ܙܵܐ ܕܓܘܼܒܵܝܵܘܟܼܘܿܢ.

ܗܿܘ ܘܲܪܵܩܵܐ ܒܘܼܫ ܓܘܼܒܼܪܵܐ ܕܕܪܵܝܬܵܐ ܕܩܵܠܵܐ ܝܼܠܹܗ ܩܵܐ ܓܲܒܲܝܵܬܹܐ ܕܡܵܠܘܿܟܼܹܐ. ܡܵܨܝܼܬܘܿܢ ܡܲܬܒܼܝܼܬܘܿܢ '1' ܒܪܹܫ ܓ̰ܲܪܓܵܐ ܕܩܵܐ ܕܵܣܬܵܐ ܕܡܵܠܘܿܟܼܹܐ ܕܐܲܚܬܘܿܢ ܒܵܥܝܼܬܘܿܢ ܕܗܵܘܝܼ ܩܲܝܘܿܡܵܘܟܼܘܿܢ

ܝܲܢ

ܐܲܚܬܘܿܢ ܡܵܨܝܼܬܘܿܢ ܕܡܲܬܒܼܝܼܬܘܿܢ ܡܸܢܝܵܢܵܐ ܓܵܘ ܨܲܢܕܘܼܩܹܐ ܕܐܸܠܬܸܚܬ ܡܼܢ ܓ̰ܲܪܓܵܐ ܕܩܵܐ ܡܵܠܘܿܟܼܹܐ ܠܚܘܿܕܵܝܹܐ. ܐܸܢ ܕܪܹܐܠܵܘܟܼܘܿܢ ܩܵܠܵܘܟܼܘܿܢ ܠܐܸܠܬܸܚܬ ܡܼܢ ܓ̰ܲܪܓܵܐ، ܓܵܪܲܓ ܡܲܬܒܼܝܼܬܘܿܢ ܡܸܢܝܵܢܵܐ ܓܵܘ ܟܠܚܲܕ ܨܲܢܕܘܼܩܵܐ ܕܐ̱ܠܬܸܚܬ ܡܼܢ ܓ̰ܲܪܓܵܐ ܕܪܹܐ݉ܙܵܐ ܕܓܘܼܒܵܝܵܘܟܼܘܿܢ.

ܕܵܐܟܼܝܼ ܠܫܲܕܘܼܪܹܐ ܕܪܵܝܬܵܐ ܕܩܵܠܵܘܟܼܘܿܢ ܒܒܲܪܝܼܕܵܐ

1. ܡܲܬܒܼܘܼܢ ܠܹܗ ܘܲܪܵܩܵܘܟܼܘܿܢ ܕܕܪܵܝܬܵܐ ܕܩܵܠܵܐ ܡܸܠܝܵܐ ܓܵܘ ܙܲܪܦܵܐ ܕܘܵܪܵܩܵܐ ܕܕܪܵܝܬܵܐ ܕܩܵܠܵܐ (ܗܿܘ ܕܐܝܼܬܠܹܗ ܕܘܼܟܬܵܐ ܕܟܬܵܒܼܬܵܐ ܕܫܸܡܵܐ ܥܲܠܹܗ) ܘܕܒܼܘܿܪܘܼܢ ܠܹܗ.
2. ܡܠܹܝܡܘܼܢ ܠܦܘܼܨܵܠܹܐ ܕܡܵܘܕܥܵܢܘܼܬܵܘܟܼܘܿܢ ܥܲܠ ܕܘܼܟܬܵܐ ܕܟܬܵܒܼܬܵܐ ܕܫܸܡܵܐ ܡܘܼܬܸܒܼܬܵܐ ܥܲܡ ܙܲܪܦܵܐ ܕܘܲܪܵܩܵܐ ܕܕܪܵܝܬܵܐ ܕܩܵܠܵܐ.
3. ܡܲܬܒܼܘܼܢ ܠܙܲܪܦܵܐ ܕܒܼܝܼܪܵܐ ܕܘܵܪܵܩܵܐ ܕܕܪܵܝܬܵܐ ܕܩܵܠܵܐ ܓܵܘ ܙܲܪܦܵܐ ܕܥܲܠܹܗ ܐܲܕܪܹܣ ܘܛܝܼܡܵܐ ܕܦܘܿܣܬܵܐ ܦܪܝܼܥܵܐ ܠܵܩܵܕ݉ܡܵܐ ܡܼܢ ܩܵܕ݉ܡ ܕܫܲܕܪܝܼܬܘܿܢ ܠܹܗ.

ܡܲܕܥܸܪܘܼܢ ܠܹܗ ܩܵܐܠܲܢ ܐܲܝܟܼ ܟܡܵܐ ܕܡܵܨܝܼܬܘܿܢ ܒܓ̰ܲܠܕܘܼܬܵܐ. ܣܝܼܩܘܿܡܵܐ ܐ݉ܚܵܪܵܝܵܐ ܩܵܐ ܕܪܵܝܬܵܐ ܕܩܵܠܵܘܟܼܘܿܢ ܕܒܸܕ ܗܵܘܹܐ ܓܵܘ ܒܲܪܝܼܕܵܐ ܝܼܠܹܗ ܣܵܥܲܬ 6 ܒܪܲܡܫܵܐ ܒܝܵܘܡܵܐ ܕܥܪܘܼܒܼܬܵܐ 25 ܬܸܫܪܝܼܢ ܩܲܕ݉ܡܵܝܵܐ. ܨܲܚܨܝܼܡܘܼܢ ܡܘܿܕܝ݉ ܥܸܕܵܢܵܐ ܟܹܐ ܦܵܐܹܫ ܫܩܝܼܠܵܐ ܒܲܪܝܼܕܵܐ ܡܼܢ ܨܲܢܕܘܼܩܵܐ ܕܒܲܪܝܼܕܵܐ ܡܲܗܲܠܵܝܵܐ ܕܕܝܼܵܘܟܼܘܿܢ ܩܵܐ ܕܐܲܟܸܕܝܼܬܘܿܢ ܕܙܲܪܦܵܐ ܕܕܪܵܝܬܵܐ ܕܩܵܠܵܘܟܼܘܿܢ ܦܝܼܫܵܐ ܝܠܹܗ ܫܘܼܕܪܵܐ ܒܒܲܪܝܼܕܵܐ ܒܥܸܕܵܢܵܐ.

ܡܵܢܝܼ ܓܵܪܲܓ ܕܵܪܹܐ ܩܵܠܵܐ

ܐܸܢ ܐܲܚܬܘܿܢ ܝܼܬܘܿܢ ܣܘܼܓܼܸܠܹܐ، ܓܵܪܲܓ ܕܵܪܝܼܬܘܿܢ ܩܵܠܵܘܟܼܘܿܢ. ܐܸܢ ܠܵܐ ܕܪܹܐܠܵܘܟܼܘܿܢ ܩܵܠܵܘܟܼܘܿܢ، ܒܲܠܟܵܐ ܩܲܒܠܝܼܬܘܿܢ ܚܲܕ ܦܘܼܪܥܵܢܵܐ ܕܬܲܢܒܵܐ (ܓ̰ܸܙܵܐ) ܕ $99 ܐܸܢ ܠܲܝܬܠܵܘܟܼܘܿܢ ܚܲܕ ܣܲܒܵܒ ܨܦܵܝܝܼ.

ܟܠ ܚܕܵܐ ܕܪܵܝܬܵܐ ܕܩܵܠܵܐ ܟܹܐ ܦܵܝܫܵܐ ܚܘܼܫܒܸܢܬܵܐ، ܘܕܪܵܝܬܵܐ ܕܩܵܠܵܘܟܼܘܿܢ ܐܝܼܬܠܵܗܿ ܐܵܢܲܢܩܵܝܘܼܬܵܐ. ܟܠ ܚܕܵܐ ܓܲܒܲܝܬܵܐ ܝܼܠܵܗܿ ܦܘܼܪܣܵܐ ܩܵܐܠܵܘܟܼܘܿܢ ܕܕܵܪܝܼܬܘܿܢ ܠܹܗ ܩܵܠܵܘܟܼܘܿܢ ܒܘܼܬ ܡܵܢܝܼ ܒܸܕ ܗܵܘܹܐ ܩܲܝܘܿܡܵܘܟܼܘܿܢ ܒܘܼܬ ܨܒܼܘܼܝܵܬܹܐ ܕܐܲܚܬܘܿܢ ܟܹܐ ܬܲܚܡܸܢܝܼܬܘܿܢ ܒܝܼܲܝܗܝ.

ܠܹܐ ܝܬܘܿܢ ܠܲܐܟܼܵܐ ܒܥܸܕܵܢܵܐ ܕܓܲܒܲܝܵܬܹܐ

ܐܸܢ ܐܲܚܬܘܿܢ ܒܸܕ ܗܵܘܝܼܬܘܿܢ ܪܸܚܩܵܐ ܡܼܢ ܐܵܕܪܹܣܵܘܟܼܘܿܢ ܥܝܵܕܵܝܵܐ ܒܹܝܠ ܬܪܹܝܢܒܫܲܒܵܐ 7 ܘܥܪܘܼܒܼܬܵܐ 25 ܬܸܫܪܝܼܢ ܩܲܕ݉ܡܵܝܵܐ، ܗܵܠܵܐ ܡܵܨܝܼܬܘܿܢ ܕܵܪܝܼܬܘܿܢ ܩܵܠܵܘܟܼܘܿܢ ܓܵܘ ܓܲܒܲܝܵܬܹܐ ܕܡܵܘܬܒܼܵܐ.

ܐܲܚܬܘܿܢ ܡܵܨܝܼܬܘܿܢ ܝܲܢ:

• ܛܵܠܒܝܼܬܘܿܢ ܡܸܢܲܢ ܕܫܲܕܪܲܚ ܠܵܗܿ ܟܲܪܡܘܼܟܼܬܵܐ ܠܚܲܕ ܐܵܕܪܹܣ ܐ݉ܚܹܪ݉ܢܵܐ. ܐܲܚܢܲܢ ܒܸܕ ܗܵܘܹܐܠܲܢ ܚܕܵܐ ܦ̮ܘܿܪܡ ܡܼܢ ܥܲܠ ܐܸܢܬܸܪܢܸܬ ܩܵܐ ܕܐܲܝܵܐ ܐܲܗܘܵܠ ܥܲܡܵܠܝܼܬܵܐ ܕܬܢܵܝܬܵܐ ܘܫܲܕܲܪܬܵܐ ܠܨܵܘܒܵܐ ܐ݉ܚܹܪ݉ܢܵܐ ܦܬܝܼܚܬܵܐ ܝܠܵܗܿ.
• ܕܪܹܝܡܘܼܢ ܩܵܠܵܐ ܓܵܘ ܡܲܟܼܬܒܼܵܐ ܕܓܲܒܲܝܵܬܹܐ ܓܵܘ ܡܵܘܬܒܼܵܘܟܼܘܿܢ ܒܝܵܘܡܵܢܹܐ ܕܫܵܒܼܘܿܥܵܐ ܒܹܝܠ ܚܲܡܫܵܒܫܲܒܵܐ 19 ܐܝܼܠܘܿܠ ܘܥܪܘܼܒܼܬܵܐ 25 ܬܸܫܪܝܼܢ ܩܲܕ݉ܡܵܝܵܐ. ܡܲܫܟܼܚܘܼܢ ܠܡܲܟܼܬܒܼܵܐ ܕܓܲܒܲܝܵܬܹܐ ܕܡܵܘܬܒܼܵܘܟܼܘܿܢ.

ܡܲܕܸܥܡܘܼܢ ܠܲܢ ܕܐܲܚܬܘܿܢ ܠܹܐ ܝܬܘܿܢ ܠܲܐܟܼܵܐ

ܐܸܢ ܐܲܚܬܘܿܢ ܠܵܐ ܒܸܕ ܗܵܘܝܼܬܘܿܢ ܓܵܘ ܒܼܸܟܬܘܿܪܝܵܐ ܒܹܝܠ ܬܪܹܝܒܫܲܒܵܐ 7 ܘܥܪܘܼܒܼܬܵܐ 25 ܬܸܫܪܝܼܢ ܩܲܕ݉ܡܵܝܵܐ ܘܠܹܐ ܡܵܨܝܼܬܘܿܢ ܕܕܪܵܝܼܬܘܿܢ ܩܵܠܵܐ ܓܵܘ ܡܲܟܼܬܒܼܵܐ ܕܡܵܘܬܒܼܵܐ ܝܲܢ ܫܲܕܪܝܼܬܘܿܢ ܠܵܟܿ ܟܲܪܡܘܼܟܼܬܵܐ ܕܕܪܵܝܬܵܐ ܕܩܵܠܵܐ ܠܚܲܕ ܐܵܕܪܹܣ ܐ݉ܚܹܪ݉ܢܵܐ، ܡܵܨܝܼܬܘܿܢ ܡܲܕܸܥܝܼܬܘܿܢ ܠܲܢ.

ܡܲܥܢܵܝ ܕܐܵܗܵܐ ܝܼܠܹܗ ܕܐܲܚܢܲܢ ܝܵܕܥܲܚ ܕܐܲܚܬܘܿܢ ܠܹܐ ܝܬܘܿܢ ܠܲܐܟܼܵܐ ܘܠܹܐ ܡܵܨܝܼܬܘܿܢ ܕܵܪܝܼܬܘܿܢ ܩܵܠܵܐ.

ܡܲܚܒܸܪܘܼܢ 03 9209 0160 ܩܵܐ ܕܗܲܡܙܸܡܝܼܬܘܿܢ ܥܲܡܲܢ ܥܲܡ ܚܲܕ ܬܲܪܓܡܵܢܵܐ.

ܐܲܚܬܘܿܢ ܡܵܨܝܼܬܘܿܢ ܡܵܠܝܼܬܘܿܢ ܚܕܵܐ ܦ̮ܘܿܪܡ ܕ Away from Victoria form (ܒܠܸܫܵܢܵܐ ܐܸܢܓܠܸܣܢܵܝܵܐ) ܐܝܼܡܲܢ ܕܣܲܚܒܸܪܝܼܬܘܿܢ ܕܡܵܘܕܥܵܢܘܼܬܵܐ ܕܣܲܓܼܲܠܬܵܐ ܕܕܝܼܵܘܟܼܘܿܢ.

ܡܲܕܟܼܸܪܵܢܵܐ ܕܕܵܪܝܵܢܵܐ ܕܩܵܠܵܐ (VoterAlert)

VoterAlert ܝܼܠܹܗ ܚܕܵܐ ܐܸܓܲܪܬܵܐ ܬܹܠܹܦ̮ܘܿܢܵܝܬܵܐ ܟܪܝܼܬܵܐ (SMS) ܘܚܸܠܡܲܬ ܕܐܝܼܡܵܝܠ ܕܡܲܕܟܼܸܪܵܢܵܐ ܕܓܲܒܲܝܵܬܹܐ. ܡܵܨܝܼܬܘܿܢ ܩܵܢܝܼܬܘܿܢ ܚܲܕܲܬܝܵܬܹܐ ܕܓܲܒܲܝܵܬܹܐ ܘܡܲܕܟܼܸܪܵܢܹܐ ܕܕܪܵܝܬܵܐ ܕܩܵܠܵܐ (ܒܠܸܫܵܢܵܐ ܐܸܢܓܠܸܣܢܵܝܵܐ).

ܓܪܘܿܫܘܼܢ ܕܪܵܥܢܵܐ ܩܵܐ VoterAlert

ܐ݉ܢܵܫܹܐ ܕܒܸܟܠܵܝܵܐ ܝܢܵܐ ܩܵܐ ܓܲܒܲܝܵܬܹܐ

ܐܲܚܬܘܿܢ ܡܵܨܝܼܬܘܿܢ ܓܲܫܩܝܼܬܘܿܢ ܥܲܠ ܐ݉ܢܵܫܹܐ ܕܒܸܟܠܵܝܵܐ ܝܢܵܐ ܓܵܘ ܓܲܒܲܝܵܬܹܐ ܓܵܘ ܦܢܝܼܬܵܘܟܼܘܿܢ ܡܼܢ ܬܪܹܝܢܒܫܲܒܵܐ 9 ܐܝܼܠܘܿܠ (ܒܠܸܫܵܢܵܐ ܐܸܢܓܠܸܣܢܵܝܵܐ) ܐܲܚܢܲܢ ܐܵܦ ܒܸܕ ܫܲܕܪܲܚ ܠܵܘܟܼܘܿܢ ܚܲܕ ܟܬܵܒܼܘܿܢܵܐ ܥܲܡ ܓܘܼܒܵܝܹܐ ܕܐ݉ܢܵܫܹܐ ܕܕܵܪܝܼܬܘܿܢ ܩܵܠܵܐ ܩܵܐܠܲܝܗܝ ܒܟܲܪܡܘܼܟܼܬܵܐ ܕܕܪܵܝܬܵܐ ܕܩܵܠܵܐ.

ܟܠܵܝܬܵܐ ܩܵܐ ܓܲܒܲܝܵܬܹܐ

ܐܸܢ ܡܲܚܘܼܒܹܐ ܝܬܘܿܢ ܕܟܵܠܝܼܬܘܿܢ ܩܵܐ ܓܲܒܲܝܵܬܹܐ، ܐܲܚܬܘܿܢ ܓܵܪܲܓ ܡܲܚܫܸܚܝܼܬܘܿܢ ܠܵܗܿ ܓܵܢܵܘܟܼܘܿܢ. ܐܲܚܬܘܿܢ ܓܵܪܲܓ ܦܲܪܡܝܼܬܘܿܢ ܠܗܘܿܢ ܩܵܢܘܿܢܹܐ ܡܼܢ ܩܵܕ݉ܡ ܕܡܵܨܝܼܬܘܿܢ ܡܲܚܫܸܚܝܼܬܘܿܢ ܠܵܗܿ ܓܵܢܵܘܟܼܘܿܢ.

ܡܲܚܒܸܪܘܼܢ 03 9209 0160 ܩܵܐ ܕܗܲܡܙܸܡܝܼܬܘܿܢ ܥܲܡܲܢ ܥܲܡ ܚܲܕ ܬܲܪܓܡܵܢܵܐ ܩܵܐ ܕܝܵܠܦܝܼܬܘܿܢ ܒܘܼܫ ܙܵܘܕܵܐ ܒܘܼܬ ܐܲܢܹܐ ܩܵܢܘܿܢܹܐ.

ܡܲܚܫܲܚܝܵܬܹܐ ܕܫܸܡܵܢܹܐ ܠܟܠܵܝܵܐ ܩܵܐ ܓܲܒܲܝܵܬܹܐ ܒܸܕ ܦܵܬܚܝܼ ܩܵܐ ܣܵܥܲܬ 9 ܩܲܕܵܡܬܵܐ ܒܝܵܘܡܵܐ ܬܪܹܝܒܫܲܒܵܐ 9 ܐܝܼܠܘܿܠ. ܟܹܐ ܕܵܒܼܪܝܼ ܣܵܥܲܬ 12 ܟܵܘܸܬܪܵܐ ܒܝܵܘܡܵܐ ܕܬܠܵܬܒܼܫܲܒܵܐ 17 ܐܝܼܠܘܿܠ.

ܝܠܘܿܦܘܼܢ ܒܘܼܫ ܙܵܘܕܵܐ ܒܘܼܬ ܟܠܵܝܬܵܐ ܩܵܐ ܓܲܒܲܝܵܬܹܐ (ܒܠܸܫܵܢܵܐ ܐܸܢܓܠܸܣܢܵܝܵܐ).

ܐܸܢ ܐܲܚܬܘܿܢ ܠܵܐ ܕܵܪܝܼܬܘܿܢ ܩܵܠܵܐ

ܐܸܢ ܐܲܚܬܘܿܢ ܝܼܬܘܿܢ ܥܲܠ ܣܸܕܪܵܐ ܕܕܵܪܝܵܢܹܐ ܕܩܵܠܵܐ ܘܠܵܐ ܕܵܪܝܼܬܘܿܢ ܩܵܠܵܘܟܼܘܿܢ، ܒܸܕ ܩܲܒܠܝܼܬܘܿܢ ܚܕܵܐ ܐܸܓܲܪܬܵܐ ܡܸܢܲܢ ܒܵܬ݉ܪ ܓܲܒܲܝܵܬܹܐ ܒܸܛܠܵܒܵܐ ܣܲܒܵܒܵܘܟܼܘܿܢ. ܐܲܝܵܐ ܠܹܐ ܝܠܵܗܿ ܦܘܼܪܥܵܢܵܐ ܕܬܲܢܒܵܐ (ܓ̰ܸܙܵܐ)، ܐܝܼܢܵܐ ܝܼܠܵܗܿ ܐܵܢܲܢܩܵܝܬܵܐ ܕܓ̰ܲܘܸܒܝܼܬܘܿܢ ܠܲܢ. ܟܬܘܿܒܼܘܿܢ ܠܹܗ ܣܲܒܵܒ ܩܵܐ ܡܘܿܕܝܼ ܠܵܐ ܓܘܼܒܹܐܠܵܘܟܼܘܿܢ ܥܲܠ ܦ̮ܘܿܪܡ ܘܡܲܕܥܸܕܪܘܿܢ ܠܹܗ ܩܵܐܠܲܢ.

ܐܸܢ ܐܲܚܬܘܿܢ ܠܵܐ ܡܲܕܥܸܪܝܼܬܘܿܢ ܠܵܗܿ ܐܸܓܲܪܬܵܐ، ܝܲܢ ܐܸܢ ܠܲܝܬܠܵܘܟܼܘܿܢ ܣܲܒܵܒ ܚܲܝܠܵܢܵܐ ܩܵܐ ܠܵܐ ܕܪܵܝܬܵܐ ܕܩܵܠܵܐ، ܒܲܠܟܵܐ ܦܵܪܥܝܼܬܘܿܢ ܚܲܕ ܬܲܢܒܵܐ (ܓ̰ܸܙܵܐ) $99.

ܡܵܘܕܥܵܢܘܼܬܵܐ ܒܘܼܫ ܙܵܘܕܵܐ

ܐܸܢ ܐܝܼܬܠܵܘܟܼܘܿܢ ܚܲܕ ܒܘܼܩܵܪܵܐ ܒܘܼܬ ܓܲܒܲܝܵܬܹܐ ܕܡܵܘܬܒܼܵܐ ܡܲܗܲܠܵܝܵܐ ܩܵܐ ܫܲܢ݉ܬܵܐ ܕ 2024، ܡܲܚܒܸܪܘܼܢ 03 9209 0160 ܩܵܐ ܕܗܲܡܙܸܡܝܼܬܘܿܢ ܥܲܡܲܢ ܥܲܡ ܚܲܕ ܬܲܪܓܡܵܢܵܐ